SeisO Seis do Nadal Coia contará cun representante na final do Campionato de España infantil masculino. O Distevi impúxose este domingo ao Maristas Ademar León no último partido do sector e clasificouse para a cita nacional. Os campións galegos derrotaron ao equipo leonés por 29 goles a 26 tras levar o control do xogo durante os 50 minutos.

Prevíase un encontro complicado para os vigueses, xa que tiñan que facer fronte a un bo equipo coa inesperada baixa por lesión dun xogador importante como era a do pivote Samuel, con todo, os de Mingos se “enchufaron” ao partido desde o minuto un e pronto adquiriron as primeiras diferenzas importantes. “No primeiro parcial conseguimos irnos de tres goles (4-1) e iso descolocou aos xogadores do Ademar”, comenta o adestrador do Distevi Seis do Nadal Coia. O equipo leonés recortou distancias nos seguintes cinco minutos pero os locais, ben plantados sobre a cancha, pronto recuperaron de novo a renda perdida. Fóronse ao descanso gañando de catro goles (13-9) e tras él intensificaron o seu dominio ata o punto de chegar a adquirir unha renda máxima de 8 goles, 19-11, mediada a segunda parte.

Co equipo vigués pensando xa na final nacional, o Maristas Ademar León iniciou unha remontada que lle situou a 2 tantos a falta de 3 minutos para a conclusión do partido. Un arreón final que o equipo vigués soubo parar a tempo coa axuda da afección. “O público estivo inmenso. Moi animoso e entregado en toda a fase. Foi o noso xogador máis importante”, asegurou o adestrador do Distevi Seis do Nadal Coia.

No outro partido do grupo disputado na matinal deste domingo no pabellón de Coia, o San Sebastián de los Reys impúxose ao Balonmano Cáceres por 25- 19 e adxudicouse o terceiro posto.

O trofeo ao mellor xogador levouno Pablo do Ademar mentres que Víctor do Seis do Nadal Coia foi elixido como o mellor porteiro do sector.

A fase final do Campionato de España infantil masculino disputarase do 10 ao 14 deste mes nunha sé que se dará a coñecer a mediados desta semana.

O Asefa Salud Seis do Nadal Coia infantil feminino caeu derrotado ante o Malkaitz Euskubaloia por 23-18 (10-8 ao descanso) e finalizou a súa participación no sector na cuarta posición.

Malia a derrota, as viguesas ofreceron unha boa imaxe plantándose cara ao equipo que finalmente se proclamou vencedor do sector.